MICHAEL DOM
Sampela taim mi save tingting planti tumas
Long wanem as tru bilong ol kainkain bikpela hevi
I bagarapim sindaun bilong yumi ol man meri
Kuru bilong mi i kamap ston, na het bilong mi pen
Na sampela nait mi painim hat long silip
Long apinun mi bin wokabaut igo long strit maket
Mi hamamas long lukim ol wanwan mama salim banana na kumu
Wanwan man meri tu ol i raun painim kaikai
Mipela tok halo long ai tasol na igo bek gen long haus
Grisim kumu long kokonas em i kamap swit moa iet
Long bik moning mi kirap long gutpela silip tru
Mi sekim PNG Attitude na lukim Deni Tokunai long Twitter
Em putim piksa blong ol maket mama
Sanap insait long sting baret wara na hapim ol kaikai blong ol
Long ples we polisman ibin kikim igo pundaun
Mi lukim baksait het blong ol mama na ai wara i kirap nating
Lewa blong mi bruk olsem tomato long ston bilong baret
Em ino wanpela bikpela hevi bai bagarapim yumi
Nogat, emi liklik pasin nogut tasol, liklik pasin nogut
Olsem liklik binatang nogut i save bagarapim kaikai
Em wankain olsem Covid-19 na yumi poret na wari
Dispela em yumi tok olsem emi bikpela hevi
Tasol olgeta i stap wanmak aninit long ai bilong Anutu