RAYMOND SIGIMET
My thoughts on the current situation in Papua New Guinea
I olsem, i no olsem
Planti samting i no stret
Ol manmeri tok i olsem
Ol lidaman tok i no olsem
Kantri stap wankain yet
Mi lidaman blong Paliamen
Pipol makim mi, mi lidaman
Yu laik rausim mi, traim gen
Pipol givim pawa pinis long han
Na Haus Paliamen tok ‘Amen’
Giaman
Big man, wok giaman, i no wankain man
Pisin man, maus man, kamap wara man
Kainkain man, giaman, em ol kaikai man
Giaman, sampla lidaman, ol giaman man
Em samting blong pipol
Taim yu holim sia olsem bigman na lidaman
Tingim, mama i no karim yu antap long en
Em samting blong pipol, yu holim long han
Sapos han blong yu karangi, givim sia go bek gen
Wari long kantri bagarap long han
Ol uni sumatin wari long kantri na ol i no go skul
Ol tok kantri PNG wok bagarap long han blong PM
PM tok bagarap em wankain long ol narapela kantri tu
PM tok bagarap em olpela gavaman wokim, i no em